Andalúsía með Önnu Pálu – október 2025

Flogið beint með Play til Málaga. Brottför frá KEF kl 10:00 , áætluð lending í Málaga kl 17:45 að staðartíma. Þar bíður rúta sem fer með hópinn á 4ra stjörnu hótel í hinni yndislegu borg Granada, þar sem við munum gista næstu 5 nætur. Hótelið er mjög fallegt og vel staðsett í miðbænum með lítilli sundlaug á þakveröndinni og geggjuðu útsýni. 
Granada er einstaklega falleg og sögufræg borg í syðsta héraði Spánar, Andalúsíu. Borgin er þekktust fyrir Alhambra, stórkostlegt mannvirki frá valdatíma Mára sem er annar vinsælasti áfangastaður ferðafólks á Spáni. Þessi ógleymanlegi staður er á heimsminjaskrá UNESCO ásamt hinu einstaka arabíska miðaldahverfi Albaicín. Borgin er sérstaklega lífleg með skemmtilega fjölbreytt úrval af börum og veitingastöðum ásamt alls kyns forvitnilegum verslunum. 

Í dag ætlum við að kynnast Granada ærlega og skellum okkur í gönguferð með leiðsögn. Við göngum um helstu stræti og torg og skoðum merkilegustu byggingar og kennileiti borgarinnar. Við göngum meðfram ánni Darro og upp í hið undurfagra og forna Albaicín hverfi sem er á heimsminjaskrá UNESCO. Þar eru blómskreytt hvít hús og þröngar göturnar mynda sjarmerandi völundarhús og hægt að njóta stórkostlegs útsýnis yfir Alhambrahöllina með Sierra Nevada fjallgarðinn í baksýn. Við setjumst niður á vel valdan stað á spænskum hádegisverðartíma og gæðum okkur á ljúffengum tapasréttum.

Núna erum við búin að dást að Alhambra úr fjarlægð og ætlum í dag að heimsækja þennan gimstein Granadaborgar! Alhambra samanstendur af stórkostlega fallegri og einstaklega vel varðveittri Márahöll, varnarvirki og yndislegum blómagörðum með meiru. Alhambra er annar vinsælasti áfangastaður Spánar og svæðið er á heimsminjaskrá UNESCO vegna sögulegs mikilvægis og einstakrar byggingarlistar. Heimsókn í Alhambra svíkur engan og er algjörlega ógleymanleg upplifun! Eftir hallarheimsóknina þurfum við á næringu og hvíld að halda og borðum því saman á vel völdum stað í nágrenni Alhambra.

Í dag höldum við í heilsdagsferð upp í hlíðar Sierra Nevada fjallgarðsins þar sem við förum í léttan sveitasælugöngutúr milli þriggja krúttlegra þorpa á Alpujarras svæðinu. Gangan er öll niður í móti og tekur tæplega 2 klukkustundir. Sjálfsagt er fyrir þau sem vilja að ferðast með rútunni niður til endastöðvar göngunnar og hafa það náðugt þar á meðan restin af hópnum gengur niðureftir. Eftir gönguna er frjáls tími til að fá sér einhvern snæðing, skoða þetta líflega þorp og kíkja á úrvalið í skemmtilegum handverksbúðum áður en haldið er til baka.

Í dag er síðasti heili dagurinn okkar í Granada og frjáls tími um daginn. Við mælum með að þið pantið ykkur aðgang með fyrirvara í arabíska baðhúsið Hammam Al Andalus sem er ógleymanleg upplifun. Þar er einnig hægt að panta alls kyns sniðugar nuddmeðferðir. Fararstjóri verður að sjálfsögðu með viðtalstíma ef einhverjar spurningar skyldu vakna og er boðin og búin að benda á aðra áhugaverða staði sem vert er að heimsækja því af nægu er að taka. Við hittumst svo aftur um sexleytið því algjör skylda er fyrir Andalúsíufara að upplifa alvöru flamenco! Við höldum því upp í sígaunahverfið Sacromonte þar sem við eigum bókaða um það bil klukkustundarlanga flamencosýningu í helli sem var notaður til búsetu frá því á 15. öld og hefur verið vinsæll flamencosýningarstaður í yfir 70 ár.

Í dag kveðjum við Granada og leggjum af stað um morguninn í rútu til Málaga þar sem við gistum næstu tvær nætur á fjögurra stjörnu hóteli sem er frábærlega staðsett í miðbænum. Það er engin föst dagskrá það sem eftir er dagsins og upplagt að skella sér á ströndina, skoða mannlífið á hafnarsvæðinu, Gibralfaro kastalann, rómverska hringleikahúsið, Picassosafnið eða Pompidousafnið. Allir markverðustu staðirnir eru í göngufæri við hótelið okkar og fararstjóri verður til viðtals ef einhverjar spurningar vakna.

Í dag skoðum við El Caminito del Rey, litla konungsveginn. Stígurinn var upphaflega byggður til að auðvelda starf við vatnsaflsvirkjun sem reist var í byrjun 20. aldar en nafngiftina fékk hann vegna þess að kóngurinn mætti á svæðið til að vígja virkjunina.  Leiðin liggur meðfram stórkostlegu gljúfri og síðan á brú þvert yfir gljúfrið með stórbrotnu útsýni. Gönguleiðin var á árum áður í niðurníðslu en var endurbætt og opnuð ferðamönnum með miklum öryggisráðstöfunum árið 2015. Síðan þá hefur konungsvegurinn notið gífurlegra vinsælda og er í dag einn af vinsælustu ferðamannastöðum Andalúsíuhéraðs. Við komum aftur til Málaga seinni partinn en hittumst svo um kvöldið og höfum smá kveðjustund saman hópurinn og gleðjumst yfir eftirminnilegri ferð.

Beint flug með Play frá Málaga til KEF. Rúta á flugvöllinn frá hótelinu. Flugtak er á þægilegum tíma kl 17:45 þannig að tími gefst til að klára að skoða borgina fyrir flugið eða bara slaka á og njóta síðusta dagsins. Lending í KEF kl 20:35