Kólumbía: Ævintýri með Önnu Pálu – febrúar 2026

Hópurinn tekur flug um morguninn til Amsterdam með Icelandair og gistir þessa nótt á hóteli í námunda við flugvöllinn.

Við fljúgum snemma morguns til Bogotá, hinnar heillandi höfuðborgar Kólumbíu og lendum kl. 14.30 að staðartíma.  Hópurinn heldur beint í hið líflega, sögufræga hverfi borgarinnar, La Candelaria þar sem við munum gista í þrjár nætur. Við verðum á fallegu og einstaklega vel staðsettu hótel í stuttu göngufæri við allt markvert í gamla miðbænum. Eftir smá hvíld förum við í göngutúr með leiðsögn um hverfið þar sem við stoppum á öllum markverðustu stöðunum í gamla miðbænum. Síðan gæðum við okkur á einum af eftirlætisréttum Bogotá-búa á sögufrægum veitingastað.

Eftir morgunmatinn erum við það heppin að eiga heimboð í Árnastofnun þeirra Kólumbíumanna sem er til húsa í einstaklega fallegri byggingu. Þar munum við fá skemmtilega fræðslu um Kólumbíumenn og skyggnast aðeins inn í þjóðarsál þeirra til að skilja sem best þessa þjóð sem við erum að sækja heim. Eftir hádegishlé förum við svo beint að skoða hin frábæru listaverk Fernando Botero, en verkin hans eru auðþekkjanleg á hinum „umfangsmiklu“ persónum, eins og hann sjálfur kallaði þær. Við fáum leiðsögn um þetta skemmtilega safn, þar sem ennfremur er að finna verk eftir aðra þekkta listamenn. Eftir listaupplifunina ætlum við svo að spreyta okkur á þjóðaríþrótt Kólumbíumanna, tejo!

Eftir morgunmat skoðum við gersemar Museo del Oro, gullsafnsins, þar sem er að finna yfir 55.000 fornminjar kólumbískra frumbyggja.   Eftir safnið verðum við örugglega orðin svöng og drífum við okkur beint í hádegismat á veitingastað í nágrenninu. Við göngum svo með leiðsögumanninum okkar að Monserrate hæð og tökum kláf þangað upp sem er ævintýraleg upplifun. Þar heimsækjum við hina sögufrægu pílagrímakirkju sem staðsett er á hæðinni í 3150 metra hæð yfir sjávarmáli. Við njótum svo stórkostlegs útsýnis yfir borgina umkringd fjölbreyttum gróðri og kíkjum á markað sem staðsettur er þarna uppi.

Í dag fljúgum við til Armenia og höldum þaðan í stutta rútuferð til hins ofursæta þorps Salento þar sem við munum eyða næstu þremur nóttum. Hótelið er einstaklega kósí með útsýni yfir náttúrufegurðina og skartar auk þess heitum pottum. Þorpið Salento er staðsett í hjarta kaffihéraðanna og þekkt fyrir afar falleg og litrík hús og fyrir að vera elsta þorpið hér um slóðir. Allt umhverfið er ægifagurt og mannlífið einstakt. Við komum okkur fyrir á hótelinu og höldum svo í stuttan göngutúr með leiðsögumanni um þorpið. 

Í dag verðum við leidd í allan sannleika um kaffirækt þar sem við heimsækjum einn af fjölmörgum kaffibúgörðum í nágrenninu. Þar verður farið með okkur í gegnum allt ferli kaffiframleiðslu frá baun til bolla, og að sjálfsögðu endar heimsóknin á kaffismökkun. Ferðin fram og til baka er ævintýraleg þar sem við munum ferðast á Willys jeppum, „strætóum“ kaffihéraðsþorpanna. Ógleymanleg upplifun og með eindæmum hressandi! Eftir hádegi er frjáls tími til að rölta um götur þorpsins sem eru sérstaklega líflegar á sunnudögum.

Í dag skoðum við Cocora dalinn sem er frægur fyrir að vera skrýddur hæstu pálmatrjám heims. Algjörlega ómissandi upplifun er að berja þetta umhverfi augum. Eftir þessa náttúruskoðun höldum við til fallega þorpsins Filandia, þar sem við skoðum hina fögru kirkju, röltum um bæinn og njótum útsýnisins. Við fáum ennfremur fræðslu og sýnikennslu um handverk þorpsbúa. Hádegismatur úr héraði er innifalinn.

Eftir morgunmat kveðjum við Salento því við ætlum að baða okkur í fossi og slaka á í heilsuböðunum Termales de Santa Rosa. Náttúruböðin koma úr uppsprettu í yndislega fallegu umhverfi þar sem við getum sturtað okkur í volgum fossi í miðju blómskrúði og slappað af í ánni fyrir neðan. Auk þess getum við notið rómaðra áhrifa þessa lindarvatns í nokkrum mismunandi heitum manngerðum laugum á svæðinu. Vatnið er þekkt fyrir heilandi eiginleika bæði fyrir sál og líkama. Við erum það heppin að fá að gista á svæðinu og erum því með einkalaugar við hótelið sem eru einungis til afnota fyrir hótelgesti. Einnig er hægt að bóka nudd í heilsulindinni ef vilji er fyrir hendi.

Við höldum af stað um morguninn í rútunni okkar til að heimsækja enn einn gimstein kaffihéraðanna, þorpið Jardín, sem er oft sagt vera fallegasti bær kaffihéraðanna.  Ferðin tekur 4-5 klst og við stoppum á hentugum stað fyrir hádegismat. Við komum okkur svo fyrir í rólegheitunum á hótelinu okkar þar sem við munum gista næstu 2 nætur.

Í dag höldum við í heilsdagsferð með svæðisleiðsögumanni. Við skoðum allt það helsta í litríku þorpinu ásamt því að kanna náttúru- og dýralíf í nánasta umhverfi, njótum dæmigerðs “paisa” matar úr héraði og lærum um menningu svæðisins.

Við höldum af stað eftir morgunmatinn alla leiðina til Guatape og munum við stoppa á hentugum stað fyrir hádegismat á leiðinni. Í Guatape gistum við næstu 2 nætur. Við slökum á seinni partinn eftir rútuferðina, en hótelið er með sundlaug, pottum og saunu ásamt fallegu útsýni yfir vatnið og klettinn ótrúlega sem svæðið er þekkt fyrir. 

Við könnum umhverfið með svæðisleiðsögumanni sem mun segja okkur allt um klettinn ótrúlega El Peñol, sem þau sem vilja geta spreytt sig á að klífa en þangað upp eru 740 þrep. Verðlaunin eru frábært útsýni yfir vatnið og ægifagurt umhverfið. Þau sem vilja geta slakað á niðri við uppgöngu á klettinn en þar er að finna bari, búðir og veitingastaði. Við heimsækjum svo miðbæ Guatape sem státar af sérstaklega skemmtilega myndskreyttum húsum, fáum okkur hádegisverð á vel völdum stað og endum á bátsferð á vatninu.

Við höldum um morguninn á flugvöllinn og fljúgum beinustu leið til fegurðardrottningar Karíbahafsins, Cartagena. Borgin er ægifögur enda er gamli bærinn á heimsminjaskrá UNESCO fyrir einstaklega fagrar og vel varðveittar nýlendubyggingar. Hér er allt iðandi af fjölbreyttu mannlífi og mikil gleði. Við skráum okkur inn á hótel í hinu litríka Getsemaní hverfi sem Forbes tímaritið útnefndi á dögunum eitt af svölustu hverfum heims. Þar gistum við næstu 2 nætur en hótelið okkar skartar miklum gróðri, sólpalli, húsagarði og lítilli sundlaug. 

Í dag skellum við okkur í um það bil þriggja klukkustunda gönguferð með matarívafi um gamla bæjarhlutann þar sem við verðum frædd um margslungna sögu Cartagena. Við smökkum framandi ávexti, bestu götubitana og dæmigerða eftirrétti þessa Karíbahafssvæðis Kólumbíu og skoðum fjölbreyttar byggingar í þessum sannkallaða suðupotti mismunandi menningarheima. Hér er mjög heitt yfir miðjan daginn og tilvalið að taka því rólega eftir morgunlabbið og kíkja svo til dæmis á úrvalið í hinum fjölbreyttu verslunum gamla miðbæjarins seinni partinn. Við mælum með að fólk panti sér borð á einum af framúrskarandi veitingastöðum borgarinnar.

Við yfirgefum ys stórborgarinnar, pökkum ofaní litla tösku eða bakpoka og höldum snemma morguns í bátsferð til hinna fögru Rosario eyja, þar sem við munum gista næstu tvær nætur í afslöppun og strandahamingju. Við gistum á eyju innan þjóðgarðsins á friðuðu svæði vegna kóralla, einstakrar náttúru og dýralífs. Á hótelinu er hægt að panta náttúruskoðunarferðir með leiðsögn um eyjuna og hjólaferðir. Einnig er hægt að snorkla, fara í köfun, kajaka- og kanóaferðir. Fyrir þau sem vilja er hægt að kaupa sér nudd eða annað dekur.

Við höldum tilbaka til Cartagena seinni partinn, en við munum gista aftur á sama hóteli og áður næstu tvær nætur. Við fáum því heilan dag í borginni til að versla, slaka á, græja okkur fyrir heimferðina og skoða okkur um. 
Ef fólk er enn ævintýraþyrst er auðvitað líka hægt að skella sér í einhverja dagsferð í nágrenni borgarinnar. Fararstjóri verður að sjálfsögðu tiltæk til skrafs og ráðagerða um slíkt. Seinna kvöldið höldum við smá lokaathöfn þar sem ferðin okkar er farin að styttast í annan endann! Við hittumst og gleðjumst saman yfir viðburðaríkri og eftirminnilegri ferð.

Beint flug til Amsterdam þar sem við gistum eina nótt og fljúgum svo áfram til Íslands.