Trufla stjúptengslin ástarlífið? 

Nærum ástina og lærum að lifa í samsettum fjölskyldum í Portó um páskana. 

Lærðu af reynslu annarra. Leiðir og hugmyndir fyrir fólk sem vill gera betur í nýju sambandi eftir skilnað.

Vinnusmiðja, samvera og rómantík í Portó, 28. mars – 4. apríl 2024

Öll viljum við forðast að endurtaka mistökin úr fyrra sambandi. Í seinna sambandi koma oft upp nýjar og breyttar áskoranir sem þarf að takast á við. Þar má nefna hvernig við stígum inn í nýja fjölskyldu, samskipti við börn og barnabörn hvors annars og samskipti við fyrri maka og stjúpfjölskyldu. Það krefst málamiðlana að skapa nýtt, sameiginlegt heimili sem öllum líður vel á og mikilvægt að ganga vel frá öllu sem snýr að fjármálum, stöðu maka við fráfall, jafnan erfðarétt barna o.s.frv. 

Þetta er tækifærið sem við fáum til að skapa nýjan lífstíl og spennandi framtíð. Langar þig til að heyra hvernig aðrir hafa lært að viðhalda trausti, virðingu og ást í nýju sambandi?

Þessi ferð er fyrir þá sem vilja leggja sig fram um að skapa farsælt samband með hvort öðru.  

Leiðbeinendur eru Hulda Ragnheiður Árnadóttir og Magnús Guðjónsson – sem hafa undanfarinn áratug vakið athygli fyrir ævintýranleg ferðalög og miðlun á allskonar uppákomum og skondnum atvikum úr sínu lífi, en þau hafa svo sannarlega reynslu af því að gera betur í „seinni umferð“.

Farsælt samband byggir á trausti, opnum tjáskiptum og sameiginlegri sýn. Á þessari blöndu af ferðalagi, upplifun og vinnusmiðju læra þátttakendur aðferðir sem gera þeim auðveldara að ná betri árangri í „seinni umferð“. Það er magnað að upplifa hvað gerist þegar hlustað er á reynslu annarra, þá opnast oft nýjar leiðir og ný tækifæri.

Við höfum sett upp vinnusmiðju fyrir pör/hjón í seinna sambandi í sólinni í Portó. Vinnusmiðjan er í fimm daga af 8 daga ferðalagi um næstu páska, en hluti af verkefnunum snúast um að skipuleggja rómantíska afþreyingu fyrir hina dagana í Portó. Hver vinnusmiðja stendur að jafnaði í þrjá tíma, svo nægur tími gefst líka til að njóta sólar og samveru.

Trúnaður ríkir milli þátttakenda um það sem fram fer á vinnusmiðjunni. Þetta er tilvalin ferð fyrir pör sem vilja styrkja sambandið, læra af öðrum og dýpka samskipti, traust og lífsgæði. 

Portó er með fallegustu borgum í Evrópu og er nefnd borg ástarsöngva. Veitingastaðir og kaffihús eru á hverju strái og það er dásemd að upplifa stórkostlegt sólsetur á göngu meðfram Douro ánni og fátt er rómantískara en sigling um ána. Svo er líka hægt að vafra bara um borgina og upplifa saman í ástarbríma sambandsins. 

Dvalist er á glæsilegu fimm stjörnu hóteli í miðbæ Porto og stutt í veitingastaði, kaffihús og aðra afþreyingu sem verður nægur tími til að njóta. 

28. mars dagur 1 – skírdagur og komudagur

15:05 Flogið með Play til Portó

19:10 Áætluð lending

20:30 Áætluð koma á hótelið

21:00 Stuttur fundur með leiðbeinendum þar sem farið er nánar yfir dagskrá vikunnar.

29. mars dagur 2 – föstudagurinn langi

10:00 – 13:00 Vinnustofa – Hvað fór úrskeiðis í fyrra sambandi og hvað getum við lært af því?

13:00 – 18:00 Frjáls tími 

18:00 – 21:00 Sameiginlegur kvöldverður – innifalið

30. mars dagur 3 

Frjáls tími til kl 14:00 

14:00 – 17:00 Vinnusmiðja um núverandi samband.  Áhersla á ást, virðingu ,umhyggju, skilyrðisleysi og ólíka eiginleika kynjanna og áhrif þess á sambandið.

Eftir 17:00 er frjáls tími 

31. mars dagur 4  – páskadagur

10:00 – 13:00 Vinnusmiðja – Hvernig nærum við sambandið og verjum frítíma okkar og sköpum eigin lífsstíl?

13:00 – 22:00 Sameiginlegur hádegisverður og hópurinn fer saman í skoðunarferð um Portó og endar í glæsilegum kvöldverði á veitingastað í borginni – innifalið

1. apríl  dagur 5 – annar í páskum

Frídagur í Portó að eigin vali en boðið verður upp á einkatíma í hálfa klukkustund með leiðbeinendum fyrir hver hjón/par. Þátttakendur sem þess óska fá úthlutað tíma. 

2. apríl dagur 6

Frjáls tími 

14:00 – 17:30 Vinnusmiðja um stjúptengsl og fjárhag.

3. apríl dagur 7

10:00 – 13:00 Vinnusmiðja. Samantekt og úrvinnsla frá fyrri dögum. 

18:00 Lokahóf – innifalið

4. apríl dagur 8 heimferðardagur

18:00 – Lagt af stað frá hótelinu á flugvöllinn

20:55 Flogið frá Portó

23:55 Áætluð lending í Keflavík.