Kólumbía: Ævintýri með Önnu Pálu – páskar 2027

Hópurinn tekur flug um morguninn til Amsterdam og gistir þessa nótt á hóteli í námunda við flugvöllinn.

Við fljúgum snemma morguns til Bogotá, hinnar heillandi höfuðborgar Kólumbíu og lendum kl. 14.30 að staðartíma.  Hópurinn heldur beint í hið líflega, sögufræga hverfi borgarinnar, La Candelaria þar sem við munum gista í tvær nætur. Við verðum á fallegu og einstaklega vel staðsettu hótel í stuttu göngufæri við allt markvert í gamla miðbænum. Eftir smá hvíld förum við í göngutúr með leiðsögn um hverfið þar sem við stoppum á öllum markverðustu stöðunum í gamla miðbænum. Síðan gæðum við okkur á einum af eftirlætisréttum Bogotá-búa á sögufrægum veitingastað.
Innifalið: Rúta frá flugvellinum, kvöldverður, leiðsögn.

Eftir morgunmat skellum við okkur á safn til að skoða hin frábæru listaverk Fernando Botero, en verkin hans eru auðþekkjanleg á hinum „umfangsmiklu“ persónum, eins og hann sjálfur kallaði þær. Við fáum leiðsögn um þetta skemmtilega safn, þar sem ennfremur er að finna verk eftir aðra þekkta listamenn. Eftir listaupplifunina ætlum við svo að spreyta okkur á þjóðaríþrótt Kólumbíumanna, tejo sem líkist kannski einna helst pílukasti eða keilu. Hægt verður að fá sér gómsætar empanadas á staðnum meðan leikar standa yfir. Við höldum svo að Monserrate hæð og tökum kláf þangað upp sem er ævintýraleg upplifun. Þar heimsækjum við hina sögufrægu pílagrímakirkju sem staðsett er á hæðinni í 3150 metra hæð yfir sjávarmáli. Við njótum svo stórkostlegs útsýnis yfir borgina umkringd fjölbreyttum gróðri og kíkjum á markað sem staðsettur er þarna í hæstu hæðum.
Innifalið: Aðgangur að Museo Botero ásamt leiðsögn um safnið. Tejo-leikur.

Í dag fljúgum við til Armenia og höldum þaðan í stutta rútuferð til hins ofursæta þorps Salento þar sem við munum eyða næstu þremur nóttum. Hótelið er einstakt, umkringt gróðri í miðri stórkostlegri náttúrufegurðinni og skartar auk þess heitum pottum. Þorpið Salento er staðsett í hjarta kaffihéraðanna og þekkt fyrir afar falleg og litrík hús og fyrir að vera elsta þorpið hér um slóðir. Allt umhverfið er ægifagurt og mannlífið einstakt. Við komum okkur fyrir á hótelinu og höldum svo í stuttan göngutúr með leiðsögumanni um þorpið sem endar á veitingastað þar sem við borðum öll saman.
Innifalið: Flug frá Bogotá til Armenia, kvöldmatur, rútuferðir og leiðsögn.

Í dag verðum við leidd í allan sannleika um kaffirækt þar sem við heimsækjum einn af fjölmörgum kaffibúgörðum í nágrenninu. Þar verður farið verður með okkur í gegnum allt ferli kaffiframleiðslu frá baun til bolla, og að sjálfsögðu endar heimsóknin á kaffismökkun. Ferðin fram og til baka er ævintýraleg þar sem við munum ferðast á Willys jeppum, „strætóum“ kaffihéraðsþorpanna. Ógleymanleg upplifun og með eindæmum hressandi! Eftir hádegi er frjáls tími til að njóta lífsins, kíkja í litlu búðirnar á aðalgötunni, fara í ævintýragöngu eftir stígunum kringum hótelið okkar eða slaka á í pottinum.
Innifalið: Jeppaferðir, heimsókn á kaffibúgarð með leiðsögn.

Í dag skoðum við Cocora dalinn sem er frægur fyrir að vera skrýddur hæstu pálmatrjám heims en það er algjörlega ómissandi upplifun er berja þetta draumkennda umhverfi augum. Eftir þennan náttúrugöngutúr höldum við til fallega þorpsins Filandia, þar sem við skoðum allar fallegu byggingarnar, röltum um bæinn og njótum útsýnisins yfir nærliggjandi sveitir. Við fáum ennfremur fræðslu og sýnikennslu um handverk þorpsbúa. Hádegismatur úr héraði er innifalinn.
Innifalið: Dagsferð með leiðsögn, rútuferðum og hádegisverði, auk aðgangseyris á útsýnisstaði í Cocoradalnum.

Eftir morgunmat kveðjum við Salento því við ætlum að baða okkur í fossi og slaka á í heilsuböðunum Termales de Santa Rosa. Náttúruböðin koma úr uppsprettu í yndislega fallegu umhverfi þar sem við getum sturtað okkur í volgum fossi í miðju blómskrúði og slappað af í ánni fyrir neðan. Auk þess getum við notið rómaðra áhrifa þessa lindarvatns í nokkrum mismunandi heitum manngerðum laugum á svæðinu. Vatnið er þekkt fyrir heilandi eiginleika bæði fyrir sál og líkama. Við gistum eina nótt á fallegu sveitahóteli í nágrenninu.
Innifalið: Rútuferð og aðgangur í náttúruböðin.

Við höldum um morguninn á flugvöllinn og fljúgum beinustu leið til fegurðardrottningar Karíbahafsins, Cartagena. Borgin er ægifögur enda er gamli bærinn á heimsminjaskrá UNESCO fyrir einstaklega fagrar og vel varðveittar nýlendubyggingar. Hér er allt iðandi af fjölbreyttu mannlífi og mikil gleði. Við skráum okkur inn á hótel í hinu litríka Getsemaní hverfi sem Forbes tímaritið útnefndi á dögunum eitt af svölustu hverfum heims. Þar gistum við næstu 2 nætur en hótelið okkar skartar miklum gróðri, sólpalli og lítilli sundlaug. 
Innifalið: Flug til Cartagena, rúta með leiðsögn á hótelið.

Í dag skellum við okkur í um það bil þriggja klukkustunda gönguferð með matarívafi um gamla bæjarhlutann þar sem við verðum frædd um margslungna sögu Cartagena. Við smökkum framandi ávexti, bestu götubitana og dæmigerða eftirrétti þessa Karíbahafssvæðis Kólumbíu og skoðum fjölbreyttar byggingar í þessum sannkallaða suðupotti mismunandi menningarheima. Hér er mjög heitt yfir miðjan daginn og tilvalið að taka því rólega eftir morgunlabbið og kíkja svo til dæmis á úrvalið í hinum fjölbreyttu verslunum gamla miðbæjarins seinni partinn. Við mælum með að fólk panti sér borð á einum af framúrskarandi veitingastöðum borgarinnar.
Innifalið: Leiðsögn með matarívafi.

Við yfirgefum ys stórborgarinnar, pökkum ofaní litla tösku eða bakpoka og höldum snemma morguns í bátsferð til hinna fögru Rosario eyja, þar sem við munum gista eina nótt í afslöppun og strandahamingju. Við gistum á eyju innan þjóðgarðsins á svæði sem er friðað vegna fallegra kóralla, einstakrar náttúru og dýralífs. Á hótelinu er hægt að panta náttúruskoðunarferðir með leiðsögn um eyjuna og hjólaferðir. Einnig er hægt að snorkla, fara í köfun, kajaka- og kanóaferðir. Fyrir þau sem vilja er hægt að kaupa sér nudd eða annað dekur. Við höldum smá lokaathöfn seinni partinn þar sem ferðin okkar er farin að styttast í annan endann! Við gleðjumst saman og skálum fyrir viðburðaríkri og skemmtilegri ferð.
Innifalið: Bátsferð fram og tilbaka að Isla Grande.

Við höldum tilbaka til Cartagena seinni partinn, þar sem við gistum aftur á sama hóteli og áður. 

Við höldum heim til Íslands í dag og fljúgum af stað seinni partinn þannig að hægt er að nýta daginn í frekari borgarskemmtilegheit. Næturflug til Amsterdam og síðan áfram heim.