Perúævintýri með Önnu Pálu – júní 2027

Við eigum flug á þægilegum tíma um ellefuleytið með Icelandair og lendum í Amsterdam rúmlega fjögur þar sem við tékkum okkur inn á flugvallarhótel. Á hótelinu er veitingastaður, bar og líkamsræktarstöð en einnig hjólaleiga ef fólk vill fá sér hjólatúr í nágrenninu. Auðvitað er tilvalið fyrir ferðalanga að kíkja í kvöldverð í miðbæ Amsterdam ef stemning er fyrir því, eða bara í miðbæ Hoofddorp sem er í innan við 10 mínútna akstursfjarlægð og geymir úrval veitingastaða.

Við eigum flug í dag kl. 9:55 með KLM beinustu leið til höfuðborgarinnar Lima. Við lendum kl. 15:25 seinnipartinn og höldum beint á fallega hótelið okkar í Miraflores hverfinu. Vinsæll veitingastaður er á hótelinu og upplagt að hópurinn borði kvöldmat saman, en engin dagskrá er fyrirhuguð þetta kvöldið þar sem við viljum gefa fólki tækifæri til að jafna sig vel eftir flugið og haga sinni dagskrá eftir hentisemi.

Við byrjum daginn á því að drekka í okkur sögu og menningu á Larco safninu fræga og fáum þar leiðsögn til að njóta heimsóknarinnar sem best. Hér er að finna stórkostlega listmuni, keramík, gull og gersemar, bæði frá tímum frumbyggja og frá nýlendutímanum. Við endum heimsóknina á að skoða hið forvitnilega erótíska gallerí safnsins og dást að blómskrúðinu í safngarðinum.
Lima er heimsþekkt fyrir gómsætan mat og einstaka matarmenningu og því er upplagt að við dembum okkur í smá matreiðslunámskeið! Við göngum um Surquillo matarmarkaðinn og leiðsögumaðurinn okkar sér um að versla mismunandi ávexti sem við smökkum svo þegar komið er á nálægan veitingastað. Þar munum við búa til bráðhollt ceviche sem er þjóðarréttur Perúbúa og einnig hinn elegant en einfalda rétt causa limeña. Við verðum auðvitað að skála fyrir byrjun ferðarinnar þannig að okkur verður kennt að mixa  þjóðardrykkinn fína, kokkteilinn pisco sour.
Eftir matinn stoppum við á einhverjum vel völdum stað í nágrenni hótelsins til að næla okkur í eftirrétt og til að virða fyrir okkur mannlífið.

Í dag höldum við aftur upp á flugvöll því við ætlum að ferðast til hvítu borgarinnar Arequipa. Borgin er rómuð fyrir fegurð, stórkostlegar byggingar úr ljósu gosbergi og dramatískt umhverfi með útsýni að þremur mögnuðum eldfjöllum. Arequipa er á heimsminjaskrá UNESCO vegna sérstakrar samsuðu evrópsks byggingarstíls og menningarheims frumbyggja.
Flugið tekur rúmlega klukkustund en við verðum sótt og keyrð beinustu leiðina á hótelið okkar þar sem við tékkum okkur inn og getum fengið okkur eitthvað gott í svanginn.
Seinni partinn könnum við borgina í fylgd leiðsögumanns og skoðum helstu byggingar í miðborginni, en einnig munum við heimsækja stórmerkilegt og óvenju litríkt klaustur þar sem hefðarmeyjar voru vistaðar á árum áður. Svæðið er raunar eins og heil borg með strætum, hverfum og torgum, umlukið fjögurra metra háum múrveggjum.

Við segjum bless í bili við Arequipa, og höldum í tveggja daga skoðunarferð að hinu stórfenglega Colca gljúfri þar sem tignarlegir kondórar ráða ríkjum.
Leið okkar liggur um náttúrufriðlandið Salinas y Aguada Blanca þar sem við munum sjá hjarðir af villtum gullfallegum vicuñas-dýrum ásamt frænkum þeirra hinum krúttlegu alpacadýrum sem eru rollur þeirra Perúbúa. Í ferðinni njótum við stórkostlegs eldfjallaútsýniss og munum stoppa og fá okkur stóran bolla af coca-tei þar sem núna erum við að hækka okkur vel upp, og munum enda í gistingu í 3200 metra hæð hinum megin við fjöllin.
Hádegisverðarhlaðborð er innifalið í þorpinu Chivay, sem er eitt af mörgum sem liggja í Colcadalnum fagra. Eftir göngutúr um þorpið og heimsókn á markaðinn höldum við á hótelið okkar sem er staðsett á ægifögrum stað við ána til að slaka á og venjast hæðarmismuninum í rólegheitunum.

Við höldum af stað snemma um morguninn til að freista þess að sjá kondórana tignarlegu sem búa í gljúfrinu, en það er fátt sem toppar þá upplifun! Ef hópurinn verður hress og finnur ekki mikið fyrir hæðinni förum við í stutta gönguferð meðfram gljúfrinu sem er ótrúlega mikilfenglegt, en þarna erum við komin upp í um það bil 3700 metra og þurfum að hlusta vel á líkamann.
Hádegismatur er innifalinn í dag á ótrúlega fallegum útsýnisstað sem er umkringdur blómskrúði og staðsettur við brún gljúfursins mikla. Við fáum að prófa Pachamanca, eins konar Inkagrillmat, eldaðan í samræmi við ævafornar hefðir. Einnig fáum við að smakka á safa gerðum úr ávöxtum kaktusanna sem vaxa á víð og dreif á svæðinu, eða kokkteilnum Colca Sour, sem er einmitt búinn til með kaktussafanum holla.
Eftir matinn höldum við heim á hótelið þar sem hægt er að slaka á í heitum  náttúrulaugum og hvíla sig. Ef fólk er í stuði fyrir fleiri upplifanir er hægt að spreyta sig á veiði í ánni eða fara í gönguferð í ægifögru umhverfinu, en þarna er til dæmis foss í stuttu göngufæri og fornar veggmyndir.

Við höldum til baka til Arequipa um morguninn. Á leiðinni til borgarinnar stoppum við á útsýnisstað þar sem sést til 6 mismunandi eldfjalla, og líka í El Bosque de Piedra, klettaskóginum, hinum perúsku Dimmuborgum.
Við ætlum líka að freista þess í dag að sjá einhverjar af sætu kanínunum sem halda til þarna í þjóðgarðinum á leiðinni.
Frjáls tími er eftir hádegi í borginni til að rölta um, skoða í búðir eða heimsækja hið áhugaverða litla safn um ís-múmíuna Juanitu þar sem gestir fá persónulega leiðsögn.
Á hótelinu okkar er líka lítil sundlaug, gufubað og þakverönd þar sem er upplagt að slaka á  eftir ævintýrin síðustu dagana og hlaða batteríin fyrir Inkastíginn.

Við eigum flug snemma um morguninn til Cusco og þaðan höldum við beinustu leið í hinn Helga dal Inkanna þar sem við munum gista í gullfallegu umhverfi í þorpinu Ollantaytambo.
Við byrjum á því að fá okkur kaffi og morgunmat eftir flugið, og svo förum við á skemmtilegan búgarð þar sem við getum skoðað í návígi og borið saman allar fjórar tegundirnir  af kameldýraætt sem er að finna í Perú. Þar fáum við skemmtilega fræðslu um ullarvinnslu og handverk. Það verður að sjálfsögðu einnig tækifæri til að versla vandaðar ullarvörur á staðnum eða ull fyrir þau sem vilja sjálf prjóna eitthvað fallegt.
Þegar komið er á hótel munu leiðsöguhjónin okkar góðu sem verða með okkur næstu dagana halda með okkur upplýsingafund um Inkagönguna til að við verðum sem best undirbúin undir ævintýrið mikla.
Seinni partinn er engin dagskrá þar sem mælt er með að hvíla sig vel fyrir gönguna og undirbúa sig. Þau sem vilja geta notað tímann seinni partinn til að skoða mannlífið og markaðinn í þorpinu eða jafnvel rústirnar í miðbænum til að hita upp fyrir Machu Picchu.
Á hótelinu okkar er frábær veitingastaður og á svæðinu er einnig matjurtagarður, kaffibrennsla og brugghús ásamt dásamlegum blómagarði.

Í dag vöknum við snemma til að skella okkur í heils dags gönguferð um Inkastíginn og fáum í verðlaun að berja augum hina mögnuðu týndu borg Inkanna, Machu Picchu!  Við skiljum farangurinn okkar eftir og tökum það sem við þurfum fyrir þessa 2 daga með okkur. Eftir gönguna gistum við í þorpinu Aguascalientes þar sem við getum slakað vel á eftir líkamsrækt dagsins og skálum svo saman um kvöldið yfir afrekinu og ævintýrum dagsins.
Allur matur er innifalinn þennan dag.

Við vöknum snemma til að skoða vel Machu Picchu en ógleymanlegt er að upplifa sólarupprásina á þessum magnaða stað! Við njótum styrkrar leiðsagnar leiðsöguhjónanna okkar sem leiða okkur í allan sannleika um leyndardóma og sögu borgarinn fornu. Við fáum síðan frjálsan tíma í hinum líflega bæ Aguascalientes og fáum okkur góðan hádegisverð með útsýni yfir ána. Við ferðumst svo með Vistadome Observatory lestinni aftur til Ollantaytambo með stórkostlegu útsýni yfir fallegt umhverfið og dönsum við lifandi tónlist.
Við verðum komin á þægilegum tíma um fimmleytið aftur á fallega hótelið okkar í þorpinu og gistum þar eina nótt í viðbót.

Í dag höldum við í heils dags skoðunarferð um Dalinn helga þar sem við munum eyða deginum súpandi hveljur yfir hinu ótrúlega útsýni yfir fögur fjöll og græna dali. Meðal annars munum við skoða hinar súrrealísku saltnámur í Maras ásamt ótrúlegum hringlaga landbúnaðarstöllum í Moray sem voru liður í tilraunum Inkanna í matjurtarækt.
Framúrskarandi hádegisverðarhlaðborð er innifalið í dag á ægifögrum stað.
Eftir að hafa skoðað nægju okkar höldum við beinustu leið til Cusco, hinnar heillandi fornu höfuðborgar Inkaveldisins þar sem við munum gista næstu þrjár nætur. Hótelið er staðsett í gömlu aðalssetri í nýlendustíl.

Í dag hefjum við daginn á að heimsækja hið mikilfenglega Sacsayhuaman virki sem er sett saman úr risastórum steinblokkum og tékkum á útsýninu yfir borgina við Jesúlíkneskið hvíta sem breiðir út faðminn yfir þessari fornu höfuðborg Inkanna. Eftir það göngum við um miðbæ Cusco en þar er vanalega mikið mannlíf á sunnudögum í júní, dansað á torgum og alls kyns hátíðahöld. Við sýnum ykkur hvar skemmtilegt er að rölta um og staði sem hægt er að skoða á eigin spýtur síðar. Hópurinn borðar svo hádegismat saman ef vilji er fyrir hendi og þar kveðjum við leiðsögumennina okkar Jennifer og YuBen sem hafa leitt okkur af allri sinni snilld síðustu dagana um undraveröld Inkanna.

Í dag er frjáls tími í Cusco en borgin er frábærlega skemmtilegt og nóg til að skoða og upplifa. Ef fólk hefur áhuga og orku í að skoða Regnbogafjöllin Vinicunca eða Palcoyo þá er hægt að panta sér dagsferð þangað. Athugið samt að þetta felur í sér göngu í 5000 metra hæð og er því ef til vill ekki góð hugmynd fyrir þau sem finna vel fyrir hæðinni í Cusco. Í borginni er skemmtilegt að skoða Museo Inka og rölta um hið fallega San Blas hverfi eða fara í leiðangur í leit að hinni fullkomnu alpaca peysu.

Við fljúgum frá Cusco til frumskógarborgarinnar Puerto Maldonado um hádegisbil og er það næstum eins og að fljúga í annað land því allt er mjög frábrugðið því sem við höfum áður séð, landslagið, umhverfið allt og meira að segja íbúarnir.
Við verðum við sótt á flugvöllinn og keyrð að Tambopata ánni þar sem við tökum bát að frumskógarhótelinu okkar. Það er rómað fyrir fegurð, þægindi og góða leiðsögumenn enda hlaut það titilinn „Best Eco Lodge in the World“ árið 2025.
Hér er allur matur innifalinn í verði meðan við gistum í þessari náttúruparadís, umvafin frumskógi og ótrúlegri náttúru.
Í boði er úrval skoðunarferða sem við getum valið úr og verða kynntar fyrir okkur við komuna. Þær hafa að markmiði dýralífsskoðun hvort sem er fótgangandi, siglandi á ánni eða stöðuvötnum, útsýnisturnaklifur eða áhugaverðar gönguferðir sem fela í sér fræðslu um gróðurfar í frumskóginum. Hver gestur getur þannig smíðað sér prógramm eftir áhuga og valið sér gott jafnvægi milli skoðunarferða og afslöppunar. Hægt er að panta sér nudd á staðnum til að slaka á lokadagana í þessari frábæru ferð.
Á föstudaginn fljúgum við svo aftur til Lima og gistum þar eina nótt.

Við höldum heim seinnipartinn í næturflugi aftur til Amsterdam með KLM. Eftir nokkurra klst millistopp í Amsterdam, fljúgum við beinustu leið heim með Icelandair. Lent í KEF 20. júní.