Prjónað með Dagnýju: Aðventuferð til Riga 1. – 5. desember 2026

Flogið er með beint með Air Baltic til Riga frá Keflavík. Flugtak kl. 13:35 og lending í Riga 19:10. Rúta sækir hópinn og ekur á 4* hótel í gamla bænum.

Eftir staðgóðan morgunverð á hótelinu göngum við saman að þjóðbúningamiðstöðinni SENĀ KLĒTS. Þar verður boðið upp á tvær vinnustofur yfir daginn og gönguleiðsögn um gamla bæinn. Í hádeginu förum við saman á veitingastað rétt við SENĀ KLĒTS (ath. ekki innifalið í verði). Fyrir hádegi fáum við leiðsögn í að prjóna handstúkur með fallegu og óvenjulegu mynstri. Boðið upp á kaffi og lettneskt gúmmelaði. Eftir hádegisverðinn er í boði klukkutíma löng gönguleiðsögn um gamla bæinn. Á seinni parts vinnustofu dagsins fáum við kennslu í að gera lettneskt jólaskraut sem unnið er úr hálmstráum. Aftur er boðið upp á kaffi og nú fáum við lettneskt jólabakkelsi með kaffinu.

Eftir morgunmat er ekið með rútu til Limbaži, sem er um 80 km norðaustan við Riga. Fyrsta stopp verður í hinu þekkta bakaríi “Lielezers” en þaðan er selt mikið af hefðbundum brauðum og þjóðlegu bakkelsi um allt Lettland. Við kíkjum í búðina, fáum smakk og getum gert smákökuinnkaupin fyrir jólin. Svo tekur við vinnustofa í bandvefnaði að hætti heimamanna. Þaulreyndur kennari leiðbeinir um vefnaðinn. Við fáum allt í hendurnar; garn og vefgrind og njótum þess að vefa saman. Boðið upp á kaffi og smákökur. Innifalinn er síðbúinn hádegisverður á veitingastað í bænum. Eftir það heimsækjum við hina frægu spunaverksmiðju Limbažu Tīne sem opnar dyr sínar fyrir hópnum. Þar er meðal annars unnið bandið sem mest er notað í lettneska vettlinga og ofið efni í þjóðbúninga bæði fyrir Lettland og nágrannalöndin. Einnig eru ofnir hördúkar og ullarteppi í verksmiðjunni. Við fáum að skoða verksmiðjuna og býðst að versla framleiðsluvörur þeirra.
Komið aftur til Riga fyrir kvöldmat. 

Frjáls dagur með sameiginlegum hátíðarkvöldverði á Gutenbergs. Fyrir hádegið verður boðið upp á göngu í hina vinsælu verslun HobbyWool sem er meðal annars þekkt fyrir skemmtilegar gjafapakkningar með vettlingauppskriftum og garni. Þar og í fleiri vinsælum garnverslunum, fáum við allt að 15% afslátt af uppsettu verði. Það er gaman að rölta um gamla bæinn í Riga og njóta jólastemningarinnar, hvort sem er að vinda sér í að kaupa jólagjafir, tylla sér á kaffihús og prjóna, skoða Central Market eða dunda sér á jólamarkaðinum og fá sér heitt vín. Um kvöldið er svo hátíðarkvöldverður á veitingastaðnum Gutenbergs. Þar fáum við þriggja rétta máltíð með drykkjum. Frá salarkynnum Gutenbergs er fallegt útsýni yfir gamla bæinn. Veitingastaðurinn er við Dómkirkjutorgið þar sem jólamarkaðurinn er og því er tilvalið að skoða sig um á markaðinum fyrir eða eftir matinn. 

Morgunmatur í fyrra fallinu, tékkum okkur út af hótelinu og förum með rútu á flugvöllinn. Beint flug til KEF, flugtak kl. 10:25, lending 12:40.