Perúævintýri með Önnu Pálu – júní 2026

Flogið með Icelandair kl 11:00 og lent í Amsterdam kl 16:15 þar sem við tékkum okkur inn á flugvallarhótel. Þar er veitingastaður og bar, líkamsræktarstöð og einnig hjólaleiga ef fólk vill gera eitthvað sérstaklega hollenskt og fá sér hjólatúr í nágrenninu, og auðvitað er tilvalið fyrir ferðalanga að kíkja í kvöldverð í miðbæ Amsterdam ef stemning er fyrir því!

Beint flug með KLM kl 9:55 til höfuðborgarinnar Lima. Áætluð lending kl 15:25 að staðartíma og við höldum beint á fallega hótelið okkar í Miraflores hverfinu. Veitingastaður er á hótelinu og engin dagskrá er fyrirhuguð þetta kvöldið þar sem við viljum gefa fólki tækifæri til að jafna sig vel eftir flugið og haga sinni dagskrá eftir hentisemi.

Í dag höldum við í matargöngutúr um Lima, enda er hún heimsþekkt fyrir gómsætan mat og einstaka matarmenningu.
Við byrjum á því að smakka ekta perúskt kaffi og svo höldum við á markað heimamanna þar sem við virkjum öll skynfærin því alls kyns ilmur og litir eru hér alls ráðandi. Eftir það munum við gæða okkur á þjóðarrétti Perúbúa, hinu frískandi og bráðholla ceviche. Upplifunin heldur áfram í bakaríi þar sem við smökkum ýmis sætindi og prófum perúskar churros. Að lokum munum við borða gómsætan hádegismat á veitingastað þar sem við smökkum á því helsta í matargerðarlist Perúbúa.
Seinni partinn fáum við að vita allt um sögu Lima. Við skoðum Plaza Mayor, aðaltorgið sem er umkringt nýlendusetrum og mikilvægum byggingum. Síðan heimsækjum við San Francisco klaustrið sem er meðal annars frægt fyrir hinar dularfullu grafhvelfingar. Í lok ferðar tékkum við á Larcosafninu þar sem við getum dást að stórkostlegum listmunum, keramíki, gulli og gersemum bæði frá tímum frumbyggja og frá nýlendutímanum.

Í dag höldum við aftur upp á flugvöll því við ætlum að ferðast til hvítu borgarinnar Arequipa. Borgin er rómuð fyrir fegurð, stórkostlegar byggingar úr ljósu gosbergi og dramatískt umhverfi með útsýni að þremur mögnuðum eldfjöllum. Arequipa er á heimsminjaskrá UNESCO vegna sérstakrar samsuðu evrópsks byggingarstíls og menningarheims frumbyggja. Flugið tekur um 1,5 tíma en við verðum sótt og keyrð beinustu leiðina á hótelið okkar þar sem við tékkum okkur inn og getum fengið okkur eitthvað í svanginn á þakveröndinni.
Seinni partinn könnum við borgina í fylgd leiðsögumanns og skoðum helstu byggingar í miðborginni, en einnig munum við heimsækja stórmerkilegt og óvenju litríkt klaustur þar sem hefðarmeyjar voru vistaðar á árum áður. Svæðið er raunar eins og heil borg með strætum, hverfum og torgum, algjörlega aðskilin frá restinni af Arequipa af fjögurra metra háum múrveggjum.
Við endum á því að skála í perúska kokkteilnum pisco sour eða einhverjum vel völdum áfengislausum drykk á best staðsettu þakverönd borgarinnar.

Við segjum bless í bili við Arequipa, og höldum í tveggja daga skoðunarferð í hið stórfenglega Colca gljúfur þar sem tignarlegir kondórar ráða ríkjum í þessu næst dýpsta gljúfri heims.
Á leiðinni liggur leið okkar um náttúrufriðlandið Salinas y Aguada Blanca þar sem við munum sjá hjarðir af villtum gullfallegum vicuñas-dýrum ásamt frænkum þeirra hinum krúttlegu alpaca-dýrum sem eru rollur þeirra Perú-búa. Kannski verðum við líka heppin og fáum að sjá einhverjar af sætu kanínunum sem halda til þarna í þjóðgarðinum á leiðinni. Í ferðinni njótum við stórkostlegs eldfjallaútsýniss og munum stoppa og fá okkur stóran bolla af coca-tei þar sem núna erum við að hækka okkur vel upp, og munum enda í gistingu í 3400 metra hæð hinum megin við hásléttuna.
Hádegismatarhlaðborð er innifalið í þorpinu Chivay, sem er eitt af mörgum sem liggja í Colcadalnum fagra. Eftir göngutúr um þorpið og heimsókn á markaðinn höldum við á hótelið okkar sem er staðsett á ægifögrum stað við ána til að slaka á og venjast hæðarmismuninum í rólegheitunum.

Við höldum af stað snemma um morguninn til að freista þess að sjá kondórana tignarlegu sem búa í gljúfrinu, en það er fátt sem toppar þá upplifun! Einnig munum við stoppa á útsýnisstöðum ásamt  einhverjum þorpanna í kring þar sem við getum smakkað kokkteil eða safa gerðan úr ávöxtum kaktusanna sem vaxa á víð og dreif. Þorpin skarta flest fögrum kirkjum, skemmtilegum mörkuðum og líflegum torgum þar sem við verðum ef til vill það heppin að sjá þjóðdansa íbúa eða upplifa aðrar skemmtilegar uppákomur.
Hádegismatur er innifalinn í dag, og svo höldum við heim á hótelið þar sem hægt er að slaka á í sundlauginni eða heitu laugunum, spreyta sig á veiði í ánni, panta sér hestaferð eða leigja sér hjól.

Við höldum til baka til Arequipa um 10 leytið og frjáls tími er eftir hádegi í borginni til að rölta um, skoða í búðir eða berja augum frægustu múmíu Perú, ís-meyna Juanitu.

Við eigum flug snemma um morguninn til Cusco og þaðan höldum við beinustu leið í hinn helga dal Inkanna þar sem við munum gista í gullfallegu umhverfi í þorpinu Ollantaytambo. Ef tími vinnst til munum við skoða miðbæinn og stórkostlegar Inkarústirnar þar, en annars geymum við það til eftirmiðdagsins.
Við tékkum okkur inn á hótelið okkar þar sem við gistum næstu 2 nætur. Eftir smá hvíld munum við fá leiðsögn um hótelsvæðið þar sem er undurfagur blómagarður, matjurtagarður, skóli, kaffibrennsla og brugghús. Við munum síðan njóta hefðbundins síðbúins hádegisverðar í garðinum þar sem við fáum Pachamanca veislu, eins konar Inkagrillmat, eldaðan í samræmi við ævafornar hefðir.
Þau sem vilja geta svo rölt niður í miðbæ til að skoða mannlífið og markaðinn ef vilji og orka er fyrir hendi.

Í dag höldum við í heils dags skoðunarferð um dalinn helga þar sem við munum eyða deginum súpandi hveljur yfir hinu ótrúlega útsýni yfir fjallgarða og græna dali. Við munum meðal annars stoppa í Pisac til að skoða hinar stórkostlegu rústir þar ásamt því að skoða úrvalið á vinsælasta markaðnum í dalnum, berja augum hinar súrrealísku saltnámur í Maras ásamt hinum ótrúlegu hringlaga landbúnaðarstöllum í Moray.
Hádegismatarhlaðborð er innifalið í dag á skemmtilegum stað.

Í dag vöknum við snemma til að skella okkur í heils dags gönguferð um Inkastíginn (sjá lýsingu hér að ofan) og fáum sem verðlaun að berja augum hina mögnuðu týndu borg Inkanna, Machu Picchu! Við skiljum farangurinn okkar eftir og tökum það sem við þurfum fyrir þessa 2 daga með okkur í bakpoka. Allur matur er innifalinn í dag.
Eftir gönguna gistum við í Aguascalientes á fínu hóteli þar sem við getum slakað vel á eftir líkamsrækt dagsins og jafnvel verið búin að panta okkur nudd eða annað dekur fyrirfram.

Við tökum morguninn í að skoða vel Machu Picchu og fáum síðan frjálsan tíma í hinum líflega bæ Aguascalientes til að borða hádegisverð og rölta um.
Við ferðumst síðan í lest aftur til Ollantaytambo með stórkostlegu útsýni yfir fallegt umhverfið og fáum á leiðinni bæði tónlistar- og dansatriði. Við sækjum ferðatöskurnar og keyrum þar næst beinustu leið til Cusco, hinnar heillandi fornu höfuðborgar Inkaveldisins þar sem við munum gista næstu þrjár nætur.

Við fáum í dag leiðsögn um Cusco og nágrenni um ellefuleytið, ásamt því að heimsækja búgarð þar sem við getum skoðað og borið saman allar fjórar tegundir dýra af kameldýraætt sem er að finna í Perú. Þar verður einnig tækifæri til að versla vandaðar ullarvörur í verksmiðjunni, og okkur verður kennt að þekkja alvöru alpaca ull frá eftirlíkingum úr gerviefnum.
Við skoðum auðvitað miðbæ Cusco vel og vandlega, auk þess að heimsækja hið mikilfenglega Sacsayhuaman virki og tékkum á útsýninu yfir borgina við Jesúlíkneskið sem breiðir út faðminn yfir þessari fornu höfuðborg Inkanna.

Í dag er frjáls tími í Cusco en borgin er frábærlega skemmtileg og nóg að skoða og upplifa. Ef fólk hefur áhuga og orku í að skoða Regnbogafjallið Vinicunca þá er hægt að panta sér dagsferð þangað, en athugið að farið er upp í 5000 metra hæð í þessari ferð og þetta er ef til vill ekki góð hugmynd ef þið finnið nú þegar vel fyrir hæðinni í Cusco.

Við fljúgum frá Cusco til frumskógarborgarinnar Puerto Maldonado um hádegisbil og er það næstum eins og að fljúga til annars lands því allt er mjög frábrugðið því sem við höfum áður séð, landslagið, umhverfið allt og meira að segja íbúarnir. Við verðum við sótt á flugvöllinn og keyrð að Madre de Dios ánni þar sem við tökum bát að frumskógarhótelinu okkar sem er rómað fyrir fegurð, þægindi og góða leiðsögumenn.
Hér er allur matur innifalinn í verði meðan við gistum í þessari náttúruparadís, umvafin frumskógi og ótrúlegri náttúru.
Í boði er úrval skoðunarferða sem verða kynntar fyrir okkur við komuna en þær hafa að markmiði dýralífsskoðun, hvort sem er fótgangandi eða siglandi á ánni eða stöðuvötnum, útsýnisturnaklifur eða gróðurfar í frumskóginum. Hver gestur getur þannig smíðað sér prógramm eftir áhuga og valið sér gott jafnvægi milli skoðunarferða og afslöppunar en hægt er að panta nudd á staðnum til að slaka á lokadaga þessarar frábæru ferðar.
Á föstudaginn höldum við svo aftur til Puerto Maldonado eftir góðan morgunverð, fljúgum aftur til Lima og gistum þar eina nótt.

Beint flug með KLM til Amsterdam, farið af stað seinnipartinn og flogið um nóttina. Eftir ca 4 klst millistopp í Amsterdam, fljúgum við beinustu leið heim með Icelandair. Lent í KEF 21. júní.